古有木兰花，今有铁栏花。被喻为香港特区真正管治班子所在嘅西环总部，前日发生一起冲击办公大楼事故，示威者意图喺大楼铁栏上绑丝带，又大叫口号，结果一一被门口女保安化解。呢位英雌见一条丝带剪一条，仲表明共产党员身份，当面斥喝示威者「去死！」、「仆街！」勇退一班颠覆西环嘅分子。

女保安大战示威者

中国异见人士刘晓波前日被重判之后，一批示威者操去中联办抗议，示威者一度突破封锁，冲入中联办大楼范围，同保安人员发生冲突，其间一名女保安员大发雌威，坚定不移咁维护咗西环嘅稳定。

以独立中文笔会会员身份参加示威嘅蔡咏梅忆述，佢哋喺中联办嘅铁栏上绑黄丝带，表达期望刘晓波早日获得自由嘅心意，点知有个女保安早有准备，示威者绑一条，女保安就用铰剪剪一条，其中一位示威者用手护住丝带，女保安都照剪可也，剪伤示威者手指。冲突事件有人报称受伤，港岛区重案组介入调查，暂无人被捕。

呢个时候，示威者情绪高涨，蔡咏梅大嗌咗句：「打倒共产党！」女保安即刻以浓重北方口音广东话还拖：「你去死、你仆街！」蔡大姐被佢吓窒咗，咗啖口水之后问佢﹕「我闹共产党，关你乜嘢事？」女保安义正词严咁教训佢：「共产党就系好！」示威者闹佢为虎作伥系走狗，佢终於忍唔住表露身份：「我就系共产党员。」

疑似党员应感惭愧

唔怪之得呢位女保安咁英勇保衞西环，原来佢拥有咁特殊嘅身份。正所谓：智勇双全胆又壮，生平嫉恶更如仇，呢位姓周嘅女保安勇退示威者有前科；上年一批法轮功学员去西环示威，小周都试过出动雨遮同示威者对峙，死口唔认系党员嘅疑似党员梁振英、曾钰成，面对小周，真系应该感到惭愧！

新华社前日发稿谴责示威者，其实应该同时表扬呢位神勇女保安小周同志，聘用周同志嘅安民警衞，都应记一功。安民警衞深得政府器重，承包多个公屋保安合约；安民董事李林泉系退休警务处高级助理处长，至於李sir手下仲有几多共产党员，八方相信佢自己都未必清楚。

（李八方）